Skip to content

test

- Гадаадад зорчиход анхаарах зүйлс        - Монголын иргэд хилийн чанадад зорчих визийн нөхцөл        - Visa application form
ЕРӨНХИЙ КОНСУЛЫН МЭНДЧИЛГЭЭ PDF Хэвлэх И-мэйл
Бичсэн osaka   
2012 оны 3-р сарын 07, Лхагва гариг, 06:38

Кансай бүс нутагт оршин суугаа монгол ахан дүүс, япон андуудын амар мэндийг айлтган мэндчилье.

Монгол Япон хоёр орны харилцаа бүх шатанд өргөжин тэлж, улмаар монгол япон хүмүүс нөхөрлөн түншлэхийн үр цэцэглэн соёлох сайн цагт бид оршиж байна. Япон орон, япон соёл, япон технологи, япон хөгжил дэвшлийг судлах хүсэл өвөртлөн ирсэн манай олон зуун иргэд Кансай бүс нутагт аж төрж байгаа билээ. Эх орны Тань төлөөлөл болох Монголын Ерөнхий Консулын Газар Осака хотноо үүд хаалга нээснээс хойш жил гаруй хугацаа өнгөрчээ.

Тус Ерөнхий Консулын Газар нь монгол иргэддээ Монгол улсын хууль тогтоомж,  Монгол төрийн бодлоготой холбоотой мэдээ мэдээллүүдийг хүргэх, нутаг орноосоо алс хол амьдарч буй иргэддээ хууль эрх зүйн үйлчилгээ үзүүлэх, тодруулбал консулын болон нотариатын үйлчилгээг шуурхай хүргэх, иргэдийн эрх ашгийг хуулийн хүрээнд зохицуулахад хүчин чармайлт гаргаж иржээ. Эдгээр үүрэг хариуцлага нь цаашид ч Ерөнхий Консулын Газрын эрхэм зорилго байх болно.

Монгол Японы харилцааг хөгжүүлэх сайн сайхан үйлс бүхнийг хамтдаа бичих түүхийн хуудас бидний өмнө дэлгээстэй байна. Түүхийн шинэхэн хуудсанд Та бидний хичээл зүтгэл бүхэн тод томруунаар товойн үлдэж, хуудас бүхэнд үнэ цэнэтэй үйл явдлууд тэмдэглэгдэн мөнхрөхийн ерөөл өргөмү.

Та бүхэнд сайн сайхныг хүсье.

Гүнээ хүндэтгэсэн,
Монгол Улсаас Японы Осака хотод суугаа
Ерөнхий консул Ч.КУЛАНДА

Сүүлд шинэчлэгдсэн: 2014 оны 1-р сарын 29, Лхагва гариг, 00:22
 
Хүүхдүүдээс хариу ирлээ PDF Хэвлэх И-мэйл
Бичсэн osaka   
2015 оны 6-р сарын 29, Даваа гариг, 09:28

Сайн байцгаана уу, Та бүхэнд энэ өдрийн мэндийг хүргэе.

Юуны өмнө их ажлын дундуур биднийг хүлээн авч, үнэтэй цагаа зориулсанд талархал илэрхийлье. Та бүхний ярианаас Монгол гэх агуу орны тухай маш дэлгэрэнгүй мэдээллийг олж авлаа. Мөн бидэнд дүрс бичлэг, гэрэл зураг үзүүлж тайлбар хийсэн, манайхны урьдчилан өгсөн асуултын хариуг мэдээлэлдээ давхар оруулж өгсөн болохоор маш ойлгомжтой байлаа. Хамгийн түрүүнд ЕКГ-т орох үед хэлсэн “Монголын газар нутагт хөл тавьлаа гэж ойлгож болно” гэдэг үгийг сонсоод, дээрээс нь Монгол үндэсний тоглоом наадгайгаар тоглож наадсан нь бидний хувьд яг л Монголд байгаа юм шиг сэтгэгдэл төрүүлэв. Үүнээс гадна бидэнтэй дурсгалын зураг авахуулж, бэлэг дурсгалын зүйлс өгөх зэргээр хамгийн сүүлийн мөч хүртэл халуун дотноор хүлээн авсанд дахин дахин талархаж байгаагаа хэлье. Цаашид боломж олдвол Монголын талаар илүү ихийг мэдэхийг хичээх болно. Дашрамд ийм завшаанаар сурч мэдсэн зүйлийг өөрийн амьдрал, ирээдүйдээ хэрэгжүүлэхийн төлөө явах болно. Та бүхэнд эрүүл энхийг хүсэн ерөөе.

2015 оны 6 дугаар сарын 1-ний өдөр

Хирошима хотын Оцүка дунд сургууль

2 дугаар ангийн 6 дугаар бүлэг, 3 дугаар групп /Ю.Таками, М.Накаикэ, А.Танимото, Х.Харагүчи, Х.Танабэ, М.Накамура, К.Такашима, Н.Цүчияа/


Сүүлд шинэчлэгдсэн: 2015 оны 6-р сарын 29, Даваа гариг, 09:36
 
Тэрүнофүжи Г.Ган-Эрдэнийн ялалтын товчоон PDF Хэвлэх И-мэйл
Бичсэн osaka   
2015 оны 5-р сарын 29, Баасан гариг, 08:48

5 дугаар сарын 27-ны өдөр Японы мэргэжлийн сумо бөхийн холбооноос Тэрүнофүжи Г.Ган-Эрдэнэд озэки /монгол бөхийн арслан цолтой дүйнэ/ цол гардууллаа. Хэйсэйн он тоолол буюу 1989 оноос хойш төрсөн залуу бөхчүүдээс озэки цол хүртэж буй анхны залуу бөх юм. Тэрүнофүжи Г.Ган-Эрдэнэ нь озэки цол гардан авсны дараа хэвлэл мэдээллийхэнд “Сэтгэл зүй, бие махбодь, ур чадвараа улам сайжруулана”, “Аварга болохын төлөө бүхий л хүч, чадлаа дайчлан барилдана” зэрэг зайлшгүй хэлэх ёстой үгийг сүүлийн гурван хоног өдөр шөнөгүй цээжилж, давтлаа хэмээн инээмсэглэн ярьж байв. Мөн сумо бөхийн оргил болох ёкозуна цолын талаарх асуултанд “Ёкозунаг бурхан сонгодог. Бурханд сонгогдохын тулд би бүх чадлаа зориулан, хичээн барилдах болно” хэмээн хариулжээ.

Тэрүнофүжи Г.Ган-Эрдэнэ нь сумо бөхийн дэвжээнд хөл тавьснаас хойш 25 башёд барилджээ. Эдгээрээс сүүлийн хоёр удаагийн барилдаанд онцгой амжилтаар тэргүүлж озэки цол хүртэв. Хоёр башё дараалан амжилттай барилдсан түүний энэхүү амжилт нь 1951 оны 5 дугаар сарын башёд озэки цол хүртсэн Ёшибаяама-гаас хойш 64 жилийн дараа давтагдаж байгааг онцлох хэрэгтэй аж. Котошюү 19 башё барилдаж озэки цол хүртэж байсан бол түүний дараа Асашёрү 22 удаа, гурав дахь нь Тэрүнофүжи 25 башё барилдаж озэки болсон дараалалд бичигдэж байна.

1

Котошюү

19

2

Асашёрюү

22

3

Тэрүнофүжи

25

4

Акэбоно

26

5

Мусашимарү

27

6

Конишики

Таканохана

30

30

8

Хакүхо

31

Ирэх сарын башёд 3 Ёкозуна, 4 Озэки зодоглоно. Тэрүнофүжигийн тачиай буюу золгох /босож мөргөлдөх/ мэх нь ийм амжилтанд хүргэлээ гэх дүгнэлт ч байна. Озэки Кисэносато зэрэг бяртай бөхчүүдийн довтолгоог тэсч зогсоож чадвал ялалт үргэлжлэх бүрэн боломж бий. Сумогийн холбооны ерөнхийлөгч Китаноуми “Тэрүнофүжи озэки цолыг хамгаалах биш ёкозуна цолд хүрэхийн төлөө гэсэн сэтгэл зүйгээр барилдахыг хүсч байна” хэмээн онцолжээ. Тэрүнофүжи нь харьцангуй туршлага багатай боловч Их аварга Хакүхотой сүүлийн хоёр башё дараалан үзүүр түрүүний төлөө өрсөлдөж, улмаар ёкозуна Хакухогийн 7 удаагийн дараалсан ялалтыг тасалдуулсан нь олны анхаарлыг зүй ёсоор татаж байна. Одоогоор ёкозуна Хакүхог сөрөн зогсож, түүний ялалтын буухиаг зогсоож чадах магадлалтай нь Тэрүнофүжи хэмээн япончууд харж байна.


Овог нэр: Гантулга овогтой Ган-Эрдэнэ

Төрсөн огноо, газар: 1991.11.29, Улаанбаатар хот

Дууддаг нэр: Ганаа

Биеийн үзүүлэлт: Өндөр 191см, Жин 178 кг

Гэр бүл: Эцэг, эх, эгч дүүгийн хамт амьдардаг

Сайн эзэмшсэн мэх: Баруун золгооноос урагш дайрч түрэн гаргах

Япон нэрийн товчлол: Ёкозуна Тэрүкүни, Асахифүжи нарын нэрийн товчлол

 

Сүүлд шинэчлэгдсэн: 2015 оны 5-р сарын 29, Баасан гариг, 08:55
 
Бяцхан япончууд Ерөнхий Консулын газарт зочлов PDF Хэвлэх И-мэйл
Бичсэн osaka   
2015 оны 5-р сарын 26, Мягмар гариг, 01:09

Хирошима хотын Оцүка дунд сургуулийн 2-р ангийн хүүхдүүд Ерөнхий Консулын газарт айлчлав. Тэдгээр хүүхдүүд Монгол орны талаарх мэдээлэл, мэдлэгээ өргөжүүлэх, гадаад харилцаанд өөрийн биеэр оролцохыг зорилго тавьжээ. Хирошима хотоос харгалзах хүнгүйгээр хот хоорондын автобусанд сууж, Монголын Ерөнхий Консулын газрыг зорьж ирсэн нь онцлог явдал байв.

Ерөнхий Консулын газрынхан Монгол орны талаар тусгайлан бэлдсэн слайд үзүүлж, Оцүка сургуулийн сурагчдын сонирхсон асуултанд хариулт өгөв. Сурагчид Монгол орны талаар чамгүй мэдээлэл цуглуулж, бүгдээрээ нэгэн дуугаар монгол хэлээр мэндчилэх зэргээр багагүй бэлтгэл хийсэн нь ажиглагдаж байв.

Монголын боловсролын тогтолцоо, хууль, хоол хүнс, соёлын талаарх тусгайлсан асуултыг урьдчилан ирүүлж, зохих хариугаа авцгаалаа. Япон сурагчид шагайн наадгайг ихэд сонирхож, шимтэн тоглож байв. Хоёр тал харилцан бяцхан бэлэг солилцов. Японы боловсролын байгууллага хүүхдийг багаас нь гадаад улс оронтой харьцах, гадаад харилцааг сонирхох сонирхлыг нэмэгдүүлэх зорилгоор ийм үйл ажиллагааг зохион байгуулдаг байна.

Сүүлд шинэчлэгдсэн: 2015 оны 5-р сарын 26, Мягмар гариг, 01:15
 
Бүх нийтийн санал хураалт болов PDF Хэвлэх И-мэйл
Бичсэн osaka   
2015 оны 5-р сарын 19, Мягмар гариг, 03:31

Өнгөрсөн ням гаригт Осака хотын статусыг өөрчилж, таван тусгай дүүрэгтэй засаг захиргааны нэгж болгох асуудлаар тус хотын иргэдийн бүх нийтийн санал хураалт явагдлаа. Энэ сонгуульд Осака хотын 1,406,084 оршин суугч санал хураалтанд оролцож засаг захиргааны өөрчлөлтийг 694,844 иргэн дэмжиж,705,585 иргэн өнөөгийн засаг захиргааны бүтцийг хэвээр үлдээх санал өгчээ.


Осака хотын дарга “Ишинно кай” намын тэргүүн Т.Хашимото 2011 оноос Осака муж, хотыг нэгдсэн засаг захиргааны бүтэцтэй болгох, тус хотын 24 дүүргийг 5 тусгай засаг захиргаатай нэгжтэй болгох мөрийн хөтөлбөрийг дэвшүүлэн ажиллаж эхэлсэн. Гэвч Осака мужийн ИТХ-д сөрөг хүчин боловч давуу байр суурьтай Либерал Ардчилсан Нам, Комэй нам зэрэг улс төрийн намуудын дэмжлэгийг авч чадаагүйн улмаас мөрийн хөтөлбөрөө хэрэгжүүлэхэд ахиц гаргаж чадалгүй өнөөг хүрсэн юм.

Иймээс иргэдийн бүх нийтийн санал хураалтыг явуулж, ард иргэдийн дэмжлэгийг авах нь мөрийн хөтөлбөрөө хэрэгжүүлэхэд шийдвэрлэх түлхэц болно хэмээн үзсэн. Харамсалтай нь хотын дарга Т.Хашимото иргэдийн зүгээс олонхийн дэмжлэг авч чадалгүй ялагдал хүлээж, цаашид Осака хотын статус хэвээр үлдэх болов.

Санал хураалтын эцсийн дүнтэй холбогдуулан Осака хотын дарга, “Ишинно кай” намын тэргүүн Т.Хашимото бүх нийтийн санал асуулгын дүн гарсантай холбогдуулж хийсэн хэвлэлийн бага хурал дээр 2015 оны 12 дугаар сард болох хотын даргын сонгуульд дахин нэр дэвшихгүй, улс төрөөс бүрмөсөн гарах болно гэдгээ албан ёсоор мэдэгдэв.

Таатай амьдрах орчин, оршин суух нөхцөл, ирээдүйгээ өөрсдөө сонгож, ард нийт өөрөө шийдвэрлэх ардчиллын зарчим жинхэнэ утгаараа Осака хотод биеллээ оллоо.

Сүүлд шинэчлэгдсэн: 2015 оны 5-р сарын 19, Мягмар гариг, 03:41
 
<< Эхлэх < Өмнөх 1 2 3 4 5 6 7 8 9 10 Дараахи > Төгсгөл >>

Хуудас 18-с 1

Холбоос